Atvinnulífið
- Hið opinbera
Atvinnulífið er undirstaða þeirrar verðmætasköpunar sem fram fer í landinu.
Atvinnulífið, eða fyrirtækin, sjá heimilunum fyrir vinnu og selja þeim vöru og þjónustu. Fyrirtækin selja hinu opinbera sömuleiðis vöru og þjónustu sem er notað bæði við samneysluna og fjárfestingar. Ríkið skattleggur fyrirtækin en veitir þeim margháttaða þjónustu á móti.
Atvinnulífið er afar margþætt, allt frá stóriðjufyrirtækjum til handverksmanna. Samsetning þess er stöðugt að breytast og framvinda efnahagslífsins er mjög háð því að ný fyrirtæki verði til og að nýsköpun eigi sér stað innan starfandi fyrirtækja.
Umfang atvinnulífsins
Árið 2010 komu um 20 þúsund skráð félög inn á staðgreiðsluskrá og um 11 þúsund einstaklingar með skráða kennitölu.
Alls voru um 167.300 manns starfandi hér á landi árið 2010. Af þeim unnu um 9.700 manns við landbúnað og fiskveiðar, um 31.100 manns við ýmsar iðngreinar eins og fiskiðnað og annan iðnað og um 126.500 unnu við ýmsar þjónustugreinar en innan þjónustugreina unnu um 8.500 manns við opinbera stjórnsýslu.
Atvinnuleysi
Eins og sést hér að neðan er atvinnuleysi minna að jafnaði á Íslandi en í þeim löndum sem tilheyra OECD (Efnahagssamvinnu- og þróunarstofnunin) en við berum okkur gjarnan saman við þessi lönd.
