Aðrar tekjur
Aðrar tekjur en skattar
Árið 2010 voru aðrar tekjur en skattar um 63 milljarðar króna eða um 13% af tekjum ríkisins. Þessar tekjur skiptast í aðrar rekstrartekjur, sölu eigna og fjárframlög.
Aðrar rekstrartekjur
Aðrar rekstrartekjur eru arðgreiðslur frá öðrum opinberum aðilum, vaxtatekjur af skatttekjum og endurlánum ríkissjóðs, leiga á lóðum og landréttindum, dómsmálagjöld, afnotagjöld RÚV, skólagjöld, gjöld fyrir læknishjálp, lendingargjöld, skoðunar-, mælinga og eftirlitsgjöld, útgáfu skírteina og þinglýsinga, neyslu- og leyfisgjöld. Auk þess sektir, svo sem lögreglusektir, dómssektir og viðurlagsákvarðanir. Að lokum má nefna aðrar eigna- og aukatekjur.
Sala eigna
Misjafnt er eftir árum hversu miklar tekjur ríkið hefur af sölu eigna. Koma þá helst til áherslur ríkisstjórnarinnar hverju sinni um einkavæðingu og hversu mikið er af seljanlegum eignum. Söluhagnaður hlutabréfa í eigu ríkisins getur því haft töluverð áhrif á tekjur ríkissjóðs. Einnig selur ríkið fasteignir, land í þess eigu og jarðeignir.
Fjárframlög
Ríkið fær árlega ákveðin fjárframlög frá hinum ýmsu aðilum. Má í því sambandi nefna rekstrarframlög, hluta sveitarfélaga í innheimtukostnaði, framlag Happdrættis HÍ til Háskóla Íslands og viðbótarframlag sveitarfélaga vegna lífeyrisskuldbindinga.