Skipulag umhverfis-, orku- og loftslagsráðuneytisins

Skrifstofur umhverfis-, orku og loftslagsráðuneytisins eru fimm.

Skrifstofa ráðuneytisstjóra hefur umsjón með stýringu og samhæfingu innan ráðuneytisins, mannauðsmálum og upplýsingamálum.

Skrifstofa stefnumótunar og innleiðingar ber m.a. ábyrgð á að koma áherslum ríkisstjórnar og yfirstjórnar ráðuneytisins í framkvæmd með stefnumótun og innleiðingu hennar, en einnig með þróun á lagaramma, reglugerða og skýrra tímasettra markmiða.

Skrifstofa framkvæmda og eftirfylgni hefur umsjón með þeim framkvæmdum sem heyra beint undir ráðuneytið, mælingum við eftirfylgni og eftirlit með framgangi samninga og verkefna.

Skrifstofa Alþjóðamála sinnir alþjóðamálum með yfirsýn yfir alþjóðastarf og alþjóðasamninga og norrænt samstarf ráðuneytisins.

Skrifstofa fjármála og innri þjónustu hefur eftirlit með nýtingu fjármuna samkvæmt lögum um opinber fjármál og samningagerð við stofnanir og ytri aðila um framkvæmd verkefna. Þá sinnir skrifstofan einnig innri þjónustu, m.a. mannauðs- og gæðamálum og þróun starfseminnar 

Skrifstofa Alþjóðamála og Skrifstofa fjármála og innri þjónustu starfa þvert á ráðuneytið. 

Ótímabundin teymi umhverfis-, orku- og loftslagsráðuneytisins

Ótímabundin teymi starfa út frá stefnumótandi áherslum þvert á skrifstofur ráðuneytisins.  Teymin og verkefni þeirra eru:

• Orkuteymi — Stefnumótun og regluverk orkumála (raforku, eldsneytis og varma), raforkumarkaður, orkunýting, jöfnun orkukostnaðar, orkuöryggi, flutnings- og dreifikerfi raforku, orkuskipti og innviðir. 
• Loftslagsteymi — Stefnumótun og aðgerðir um samdrátt í losun gróðurhúsalofttegunda og bindingu kolefnis, losunarbókhald gróðurhúsalofttegunda, losun og binding vegna landnotkunar (LULUCF),  stefnumótun og aðgerðir vegna aðlögunar að loftslagsbreytingum, stefnumótun um kolefnishlutleysi,  viðskiptakerfi ESB með losunarheimildir (ETS), skuldbindingar Íslands í loftslagsmálum, Loftslagssamningurinn UNFCCC
• Náttúrverndar- og menningarminjateymi — Landsáætlun um uppbyggingu innviða menningarlegra og sögulegra minja, náttúruvernd, menningarminjar, líffræðileg fjölbreytni, veiðistjórnun, verndar- og orkunýtingaáætlun, þjóðgarðar, aðrar friðlýsingar og friðanir.
• Hringrásar- og umhverfisgæðateymi — Hringrásarhagkerfið, upplýsingaréttur almennings, landupplýsingar, mat á umhverfisáhrifum, málefni hafsins, mengunarvarnir, erfðabreyttar lífverur, hollustuhættir og heilbrigðiseftirlit og efnamál. 
• Náttúruvár-, vöktunar- og rannsóknarteymi — Ofanflóð og önnur náttúruvá, vöktun og rannsóknir.

Sjá einnig upplýsingar um starfsfólk umhverfis-, orku og loftslagsráðuneytisins.